Croeso i Eisteddfod Genedlaethol yr Urdd

Yn ystod y Sulgwyn, 27 Mai – 1 Mehefin 2013, bydd Eisteddfod Genedlaethol yr Urdd, un o wyliau teithiol mwyaf Ewrop sy’n denu tua 100,000 o ymwelwyr, yn cael ei chynnal ger pentref bach Boncath yn Sir Benfro. Mae dros 15,000 o blant a phobl ifanc yn cystadlu yn yr Eisteddfod bob blwyddyn mewn cystadlaethau megis canu, dawnsio a pherfformio.  Rhain yw’r gorau o tua 40,000 o gystadleuwyr ledled Cymru sydd wedi ennill eu lle yn y genedlaethol yn dilyn Eisteddfodau Cylch a Sir.

Canolbwynt yr Eisteddfod yw pafiliwn ble mae’r cystadlu yn digwydd.  Ond yn amgylchynu y pafiliwn mae tua 200 o stondinau lliwgar ac ystod o weithgareddau ar gyfer y teulu cyfan – o feiciau modur, dringo a sesiynau chwaraeon i ffair, bandiau byw a sioeau plant gyda chymeriadau teledu.  Mewn arolwg a gynhaliwyd ar y safle llynedd gan gwmni ymchwil Beauford, roedd 97% o’r ymwelwyr yn cytuno ei fod yn ddiwrnod gwych i’r teulu.

Yn ôl Aled Sion, Cyfarwyddwr yr Eisteddfod,
“Rydym yn edrych ymlaen i ymweld â Sir Benfro ddiwedd mis Mai.  Mae’n cael ei chynnal eleni ar fferm Cilwendeg ger Boncath, sydd yn safle prydferth iawn ac yn ddelfrydol gan fod digon o aceri o dir gwastad ar gyfer yr Eisteddfod, y maes carafanau a’r meysydd parcio.  Mae’n agos i’r A487, gyda mynediad o’r ddau gyfeiriad, ac mae’n fanteisiol i ni bod yr Eisteddfod wedi ei chynnal ar yr un safle nôl yn 1995".

“Mae’n ddiwrnod gwych i’r teulu – os ydych awydd eistedd yn y pafiliwn yn mwynhau y dalent anhygoel ar y llwyfan neu eisiau diwrnod llawn adloniant i’r teulu cyfan.  Rydym yn rhoi croeso cynnes i bawb ddod draw i Gilwendeg a chael blas o awyrgylch unigryw Eisteddfod Genedlaethol yr Urdd".

.

Mae tocynnau'r Eisteddfod NAWR AR WERTH am bris gostyngol tan y 30ain o Ebrill.  Gallwch eu harchebu drwy'r wefan neu ffoniwch 0845 257 1639.

Fel sefydliad cyhoeddus sy’n denu nifer fawr o bobl, gofynnodd Iechyd Cyhoeddus Cymru i ni rannu’r neges hon: 

“Mae achosion o’r frech goch yn ardal Gorllewin a Chanolbarth Cymru ar hyn o bryd. Mae’r frech goch yn glefyd heintus iawn sy’n medru achosi cymlethdodau difrifol a marwolaeth, hyd yn oed. Mae plant nad ydyn nhw wedi derbyn dau bigiad o frechlyn y frech goch, clwy’r pennau a rwbela (MMR) ac sy’n dod i ddigwyddiadau lle bo llawer o blant eraill yn wynebu perygl. Os nad ydy eich plentyn wedi ei frechu’n llawn, ewch at eich meddyg teulu i drafod brechu ar unwaith, os gwelwch yn dda. Cewch ragor o wybodaeth ar wefan www.publichealthwales.org/measles” 

Datblygu Eisteddfod yr Urdd:

Mae'r Urdd yn awyddus i dderbyn awgrymiadau ynglyn á sut i ddatblygu Eisteddfod yr Urdd yn y dyfodol. Os oes unrhyw sylwadau neu syniadau gyda chi, Cliciwch YMA

.

.