Ar ddydd Llun, 11eg o Orffennaf cynhaliwyd gweithdy ‘bît bocsio’ a rap yn Ysgol Maes yr Yrfa. Yn dangos ei ddoniau ac yn rhannu ei sgiliau ar y dydd oedd bît bocsiwr enwocaf Cymru, sef Ed Holden - neu Mr Phormula.
Cafwyd sesiynau unigol i bob dosbarth yn ystod y dydd, er mwyn dysgu sut i wneud y synau unigryw a chyfle i ysgrifennu rap Cymraeg. Yna, ar ddiwedd y dydd, daeth pawb nol at ei gilydd i berfformio ei rap, gan arddangos ei sgiliau i weddill eu blwyddyn.
Cafwyd cyfle hefyd i wrando ar ddawn arbennig Mr Phormula, wrth iddo berfformio.
Mae’r gweithdy wedi bod yn benllanw i glwb Cymraeg yn yr ysgol, o dan arweiniad tair o ferched Bl.11. Bwriad y clwb a’r gweithdy oedd hyrwyddo’r iaith Gymraeg, a hynny mewn ffordd ‘cool’, gyda’r gobaith y byddant yn defnyddio’r Gymraeg yn amlach tu allan i’r ystafell ddosbarth.
